Хицауады Сæрдар Дзанайты Барисы разамындæй арæзт æрцыд инвестициты Советы радон æмбырд. Ныхас цыд нæ регионы егъау инвестпроекттыл. Афтæ арæзтадон компанийы минæвар Юрий Гончаров радзырдта, Дзæуджыхъæуы паддзахадон программæ "уæрæсейаг бинонтæн цæрæнуæттæ"-м гæсгæ цы проект арæзт цæуы, уый тыххæй. Йæ социалон хæс у - программæйы архайджыты фатертæй сифтонг кæнын. Уыимæ базары аргъæй 20% къаддæр. Цæрæнуæтты фæзуат нысан кæнынц 120 мин квадратон метрæй фылдæр скæнын, коммерцион та 7000 квадратон метры. Хъæппæрис царды куы рауадзой, уæд фæзындзæн 100 ног куысты бынаты. æндæр инвестпроектты тыххæй радзырдта экономикон рæзты министры хæстæ рæстæгмæ æххæстгæнæг Олег Быкадоров. Куыд загъта, афтæмæй ныртæкæ нæ регионы æххæст кæнынц 5 раззагдæр проекты. Сæ иумæйаг аргъ у 78 миллиард сомы. Уыдоны фæрцы 2035-æм азмæ фæзындзæн 3 мины æмæ 500 куысты бынаты. Дзанайты Барис загъта, æппæт хъуыддæгтæм кæй хъæуы бæстон цæстдарын.