Цæгат Кавказы Суворовон æфсæддон училищæйы ацыд æппæтуæрæсеон патриотон хъазт "Зарницæ"-йы регионалон къæпхæн. Архайдтой дзы муниципалон къæпхæнты уæлахиздзаутæ, æдæппæтæй 450 лæппуйы æмæ чызджы. Хъазт байгом кæныны кадджын мадзалы арфæйы ныхæстæ загътой Суворовон училищæйы разамынд, горæты администрацийы кусджытæ, Уæрæсейы гвардийы цæгатирыстойнаг управленийы æмæ "Фыццæгты змæлды" регионалон хайады разамонджытæ. Фæрстытæ æфсæддон темæйæ, бæстæйы историйæ, рæнхъытæй раст цæуын, фыццаг медицинон æхххуыс бакæнын, стæй нырыккон техникон фæрæзтимæ кусын - хъазты архайджытæ разæнгардæй æвдыстой сæ зонындзинæдтæ. Уæлахиздзаутæ архайдзысты Цæгат Кавказы федералон зылды ерысты. Ацæудзысты Стъараполы, июны.